गृहपृष्ठ » मुख्य समाचार, राजनीति, समचारभारतीय विदेश सचिव एस.जयशंकर काठमाडौं आउने ।।

भारतीय विदेश सचिव एस.जयशंकर काठमाडौं आउने ।।

September 18, 2015२१५ पटक

भारतीय विदेश सचिव एस.जयशंकर नेपालको संविधान निर्माण प्रक्रियाको बारेमा छलफल गर्न आज काठमाडौं आउनुहुने भएको छ । भारतका प्रधानमन्त्री नरेन्द्र मोदीले आफ्नो विशेष दूतका रूपमा जयशंकरलाई काठमाडौं पठाउन लाग्नु भएको हो । प्रमुख राजनीतिक दलले पर्सि नयाँ संविधान जारी गर्ने तयारी गरेपछि भारतले विशेष दूत पठाउन लागेको हो । भारतीय प्रधानमन्त्री मोदीको विशेष दूतका रूपमा विदेश सचिव जयशंकर आज बिहान काठमाडौं आउन लागेको परराष्ट्र मन्त्रालयका प्रवक्ता ताराप्रसाद पोखरेलले जानकारी दिनुभयो । पोखरेलका अनुसार भारतीय प्रधानमन्त्रीका विशेष दूतले राष्ट्रपति रामवरण यादव र प्रधानमन्त्री सुशील कोइरालालाई भेट्ने कार्यक्रम तय भएको छ । राजनीतिक दलका कुन–कुन नेतासँग जयशंकरले भेटघाट गर्ने भन्ने बारेमा भने कुनै जानकारी नभएको परराष्ट्र मन्त्रालयले जनाएको छ । आज बिहान ९ बजे काठमाडौं आइपुगेपछि जयशंकरले १० बजे प्रधानमन्त्रीसँग भेटघाट गर्ने र त्यसपछि राष्ट्रपतिलाई भेट्ने कार्यक्रम छ । त्यसपछि राजनीतिक दलका नेतासँग भेटी जयशंकरले नयाँ संविधानका विषयमा जानकारी लिने जनाइएको छ । नेपाली कांग्रेस, नेकपा एमाले, एकीकृत नेकपा माओवादी र मधेसवादी दलका शीर्ष नेतासँग जयशंकरले छुट्टाछुट्टै भेट्ने स्रोतले जनाएको छ । भारतले मधेसी र थारुलाई संविधानसभामा फर्काएर मात्र संविधान जारी गर्न सुझाव दिइरहेको थियो ।

प्रतिकृया दिनुहोस्

मुद्रा रुपान्तरण