गृहपृष्ठ » पत्रपत्रीकासुरुङमार्ग निर्माण सुरु नभएपछि खर्च पारदर्शी बनाउन स्थानीयको माग

सुरुङमार्ग निर्माण सुरु नभएपछि खर्च पारदर्शी बनाउन स्थानीयको माग

August 5, 2015३०३ पटक

२० साउन, काठमाडौं । सुरुङमार्ग बन्ने खबरले हौसिएर कुलेखानी, खानीखेतका वासुदेव शर्माले बाख्रा बेचेर १० हजार रुपैयाँ बुझाए। 11850804_1478274895816902_47832704_n रकम बुझाएको तीन वर्ष बित्दा पनि सुरुङमार्गको काम अघि बढेन। अहिले उनी लगानी खेर जाने चिन्तामा छन्। ‘१४ वर्षदेखि चर्चामा रहेको सुरुङमार्ग अबचाहिँ बन्ला भनेर पैसा बुझायौं,’ उनले भने, ‘सुरुङमार्ग बन्नु कता हो कता, लगानी नै हराउलाजस्तो छ।’ काठमाडौं–कुलेखानी–हेटौंडा सुरुङमार्ग निर्माणको जिम्मा पाएको नेपाल पूर्वाधार विकास कम्पनीले काम अघि नबढाउँदा सिस्नेरीदेखि हेटाैंडासम्मका शर्माजस्तै १ हजार बढी सर्वसाधारण लगानी गुम्ने चिन्तामा छन्। उनीहरूले सेयरका लागि १० हजारदेखि १ लाख रुपैयाँसम्म दिएको नागरिकमा खबर छ । सुरुङमार्ग निर्माणमा रकम उठाएको करिब तीन वर्षसम्म कुनै प्रगति नदेखिएपछि स्थानीयले सञ्चालकसँग असन्तुष्टि व्यक्त गरेका हुन्। सुरुङमार्ग बनाउने आश्वासन दिएर स्थानीयबाट उठाएको लाखौं रुपैयाँ हिनामिना गरेको शंका गर्दै उनीहरूले खर्च पारदर्शी गर्न पनि दबाब दिएका छन्। पूर्वाधार विकास कम्पनीका सीमित सञ्चालकले स्थानीयको सुझाव र सरोकारसमेत लत्याएर एकतर्फी रूपमा काम गरिरहेको सिस्नेरी र खानीखेतका बासिन्दाले आरोप लगाएका छन्। संस्थापक सेयरका रूपमा स्थानीयले दिएको रकम कम्पनीका व्यक्तिले हिनामिना गरेको पूर्वसञ्चालक राजुमान महर्जनले आरोप लगाए। अब स्थानीय स्तरबाट ‘अल्टिमेटम’ दिएर जोशीलाई हटाउने र नयाँ नेतृत्व ल्याएर आयोजना अगाडि बढाउने कि भन्ने स्थानीयको विचार रहेको महर्जनले बताए। ‘सुरुङमार्ग निर्माणमा जागेको उत्साह नेतृत्वकै कारण अहिले सेलाएको छ,’ उनले भने, ‘आजसम्म उठाएको रकमको हिसाबकिताब छैन, कुन शीर्षकमा के कति खर्च भयो, यसबारे बताइएको छैन।’ स्थानीयले भैंसी, बाख्रा र कानका गहना बेचेर दिएको पैसामा नेतृत्वमा बस्ने व्यक्ति विदेश घुम्ने गरेको शंका उनले व्यक्त गरे। खानीखेतका शर्मा पनि कम्पनीको क्रियाकलापले शंका उत्पन्न गरेको बताए। ‘पैसा उठाउन नसकेको कम्पनीले खाजा, चिया खर्चको बिल २५/३० हजार देखाउँछ,’ उनले भने। कम्पनीका अध्यक्ष कुशकुमार जोशीकै नेतृत्वमा अब यो आयोजना बन्न नसक्ने महर्जनको दाबी छ। उनका अनुसार सिस्नेरी, खानीखेत, कुलेखानीलगायत क्षेत्रका १ सय ३५ व्यक्तिले करिब १५ लाख रुपैयाँ दिएका छन्। ‘आफ्नो पैसाको हिसाबकिताब नहुँदासमेत सुरुङमार्ग निर्माण गर्नुपर्नेमा भने स्थानीय एक छन्,’ उनले भने। गैरआवासीय नेपाली भवन भट्टले सुरुङमार्गका लागि ठूलो रकम जुटाउने दाबी गरेर आफूलगायत मोहन बस्नेत र हेटौंडाबासी सिद्धिलाल श्रेष्ठले सञ्चालक पद छाडेको, तर त्यही योजनाअनुसार रकम उठाउन जोशी असफल भएको उनको तर्क छ। सुरुङमार्गमा भट्टले प्रतिबद्धता जनाएको १ अर्बमध्ये १० करोड रुपैयाँ दिइसकेका छन्। कम्पनीको वर्तमान नेतृत्वले काम गर्न नसक्ने देखिएपछि भट्टले उक्त १० करोड रुपैयाँसमेत फिर्ता मागेको कम्पनी स्रोतले बतायो। जति प्रयास गरे पनि ३ वर्षसम्म आवश्यक रकम उठाउन नसकेको पक्षलाई कम्पनीले स्विकार्नुपर्ने १० लाख रुपैयाँ लगानी गरेका पूर्वसञ्चालक श्रेष्ठले बताए

प्रतिकृया दिनुहोस्

मुद्रा रुपान्तरण