गृहपृष्ठ » मुख्य समाचार, राजनीतिमन्त्रालयहरुले खर्च विवरण उपलब्ध नगराउँदा बजेट छलफल प्रभावित

मन्त्रालयहरुले खर्च विवरण उपलब्ध नगराउँदा बजेट छलफल प्रभावित

August 10, 2015२१२ पटक


काठमाण्डु, २५ साउन– विभिन्न मन्त्रालयले खर्च शीर्षकको बजेट विवरण समयमै नपठाएकाले विनियोजन विधेयकमाथिको मन्त्रालयगत छलफल प्रभावित भएको छ ।

व्यवस्थापिका संसदमा बजेट पेश भएपछि मन्त्रालयले विनियोजन भएको खर्चको शीर्षक अनुसारको कार्यक्रमको योजना तयार पारेर संसद सचिवालयमा पठाएपछि मात्र दफवार छलफल हुन्छ ।

संसद सचिवालयका अनुसार हालसम्म २१ वटा मन्त्रालयले मात्र विवरण सचिवालयलाई पठाएका छन् ।

रक्षा, गृह, परराष्ट्र, अर्थ र कानुन मन्त्रालयले खर्च शीर्षकको विवरण अझै पेश गरेका छैनन् । हाल मौजुदा मन्त्रीपरिषदमा २६ वटा मन्त्रालय रहेका छन् ।

अर्थमन्त्री डा. रामशरण महतले आर्थिक वर्ष शुरु भएलगत्तै सबै मन्त्रालयलाई खर्चको अख्तियारी दिइएकाले योजना आयोगमा धाउनुपर्ने बताएका थिए । तर, मन्त्री महतकै मन्त्रालयले हालसम्म पनि खर्च शीर्षकको बजेट विवरण पेश गरेको छैन ।

यहि साउन १५ गतेको बैठकमा सभामुख सुवास नेम्वाङले सबै मन्त्रालयले खर्चको विवरण पेश नगरेकाले बजेट छलफल प्रभावित भएको भन्दै मन्त्रालयहरुलाई ताकेता गरेका थिए ।

अघिल्ला आर्थिक वर्षहरुमा राष्ट्रिय योजना आयोगले जिल्ला स्तरका कार्यक्रम समेटेर छुट्टै बजेट पुस्तिका निकाल्ने प्रचलन थियो । तर पंहुचवाला नेताहरुले धेरै योजना छनौट गरे

पनि प्रभावकारी रुपमा काम नभएको भन्दै संसदको विकास समितिले बजेट कितावको भाग २ प्रकाशन नगर्न निर्देशन दिएको थियो ।

स्थानीय स्तरबाट जनताले नै प्रत्यक्ष रुपमा छनौट गरेका आयोजनाप्रति जिम्मेवार हुने र बजेट पनि अधिक मात्रामा सदुपयोग हुने भन्दै भाग २ पुस्तिकामा रोक लगाएको विकास समितले जनाएको छ ।

स्थानीय स्तरमा छनौट भएका योजनाहरु विभिन्न १३ वटा चरण पार गरेर मात्र योजना आयोगमा पुग्ने भएकाले उनीहरुका कार्यक्रमलाई प्राथमिकतामा दिनुपर्ने समितिको ठहर छ ।

केन्द्रमा पँहुच भएका नेताहरुले बढी आयोजना छनौट गरेर जनतमा लोकप्रिय हुन खोजेपनि पँहुच नभएका सभासदहरु पछि परेको भन्दै समितिले स्थानीयस्तरबाट आएका योजनालाई प्राथमिकतामा राख्नुपर्ने निर्णय गरेको थियो ।

प्रतिकृया दिनुहोस्

मुद्रा रुपान्तरण